राजविराज । सप्तरी प्रहरीले ठूलो परिमाणको लागुऔषध गाँजासहित दुई जनालाई नियन्त्रणमा लिएको छ । डाक्नेश्वरी नगरपालिका–६ स्थित फत्तेपुर टोलबाट प्रहरी टोलीले करिब २१ क्विन्टल गाँजा बरामद गरेको हो ।
विशेष सुराकीका आधारमा गएराति करिब १ बजे प्रहरी निरीक्षक प्रमोदकुमार साहको नेतृत्वमा खटिएको टोलीले स्थानीय ४७ वर्षीय भोला सदा र ५६ वर्षीय मंगल मुखियाको घरमा छापा मारेको थियो ।
खानतलासी गर्दा भोला सदाको घरबाट १ हजार ८३८ दशमलव ८७ किलोग्राम (५६ पोका) र मंगल मुखियाको घरबाट २६१ दशमलव ५ किलोग्राम (८ पोका) गरी कुल ६४ पोकामा २ हजार १०० दशमलव ३७ किलोग्राम (२१ क्विन्टल ३७० ग्राम) गाँजा फेला परेको जिल्ला प्रहरी कार्यालय सप्तरीले जनाएको छ ।
बरामद गाँजा र नियन्त्रणमा लिइएका दुवै जनालाई जिल्ला प्रहरी कार्यालय सप्तरीमा राखेर घटनाबारे थप अनुसन्धान अघि बढाइएको छ ।
प्रतिक्रिया दिनुहोस्