राजविराज,१५ कात्तिक

सरसफाइ कार्यमा संलग्न सरसफाईकर्मीहरुको लागि पेशागत स्वास्थ्य तथा सुरक्षा अभिवृद्धि गर्ने उद्देश्यले सप्तरीका पाँचवटा स्थानीय तह र निजि सरसफाइ सरसफाईकर्मीहरुको लागि एक दिने पेशागत स्वास्थ्य तथा सुरक्षा सम्बन्धी तालिम सम्पन्न भएको छ।

कार्यक्रमको समापन गर्दै महुली सामुदायिक विकास केन्द्रका कार्यकारी निर्देशक प्रभुनारायण चौधरीले समाजलाई स्वच्छ र स्वस्थ राख्न महत्त्वपूर्ण भूमिका निर्वाह गर्ने सरसफाइ श्रमिकहरूको स्वास्थ्य तथा सुरक्षा पहिलो प्राथमिकतामा हुनुपर्ने बताए। उनले मधेश प्रदेशकै पहिलो दिसाजन्य लेदो प्रशोधन केन्द्र चाँडै सञ्चालनमा आउने जानकारी दिँदै उक्त केन्द्रमा दिसाजन्य लेदो ल्याउने सेफ्टी ट्यांकी सफाइ श्रमिकहरूलाई परियोजनाको तर्फबाट एक–एक सेट व्यक्तिगत सुरक्षा सामग्री (PPE) उपलब्ध गराउने प्रतिबद्धता व्यक्त गरे।

तालिममार्फत सहभागीहरूले पेशागत स्वास्थ्य जोखिम, संक्रमणजन्य रोगको रोकथाम, व्यक्तिगत सुरक्षा सामग्रीको सही प्रयोग तथा सुरक्षित कार्य अभ्यासबारे व्यावहारिक ज्ञान हासिल गरेका छन्। साथै, मानव दिसाजन्य फोहोरको सुरक्षित व्यवस्थापन, दिसाजन्य लेदो प्रशोधन केन्द्रको महत्त्व तथा प्रशोधित जैविक मलको कृषि क्षेत्रमा उपयोगिताबारे जानकारी प्राप्त गरेका छन्।

 कार्यक्रमले सरसफाइकर्मीहरूको स्वास्थ्य तथा सुरक्षाप्रति सचेतना अभिवृद्धि गर्नुका साथै सुरक्षित, व्यवस्थित र मर्यादित सरसफाइ सेवा प्रवर्द्धनमा महत्त्वपूर्ण योगदान पुर्‍याउने अपेक्षा गरिएको महुली सामुदायिक विकास केन्द्रका इन्जिनियर ओम प्रकाश पण्डितले बताए ।